«We Are Lady Parts»: Finn din indre punkar, og set deg fri!
Regi og manus: Nida Manzoor.
Med: Anjana Vasan, Sarah Kameela Impey, Faith Omole, Juliette Motamed, Lucie Shorthouse.
Lengde: 6 delar à 24 min.
Vist på: NRKs nettspelar.
Konformitet er som sosial kolos for eit kvart samfunn. Det same er uutfordra kulturelle stereotypiar. Den britiske serieskaparen Nida Manzoor (som regisserte «Doctor Who»-sesongen med Jodie Whittaker som doktoren) gjev oss tiltrengt oksygentilførsel med den subtilt subversive komedien «We Are Lady Parts». Det er ei uimotståeleg, sjølvironisk hylling av jentemakt utan beautyfilter, og ein serie som nyttar potensialet i punkens hardtslåande tregrepslåtar og komediens oneliners til å nyformulera innsikta om at frigjering må vera eins eige verk.
