Ein av dei som var med å forma den tidlege filmhistoria om 22. juli, var tv-journalist og dokumentarist Tommy Gulliksen. Då terroren råka i Oslo og på Utøya, var han i gang med dokumentaren «En liten øy i verden». Til liks med Kari Anne Moe («Til ungdommen»), som også hadde gjort opptak på Utøya like før terroristen slo til, fekk Gulliksen ferdigstilt ein annan film enn planlagt på rekordtid. Alt 30. august 2011 vart «En liten øy i verden» vist på TV 2. Der og då var det krevjande stoffet godt handtert, både som eit svar på det enorme informasjonsbehovet alle kjende, og som eit motsvar til propagandafella terroristen hadde rigga for media.