Marilynne Robinson
Jack
Roman
Farrar, Straus and Giroux 2020, 310 sider
Tittelpersonen i Marilynne Robinsons nye roman «Jack» er ein landsens mann i storbyen med trouble in mind og liquor on his breath. Tidleg i romanen går han rundt på ein gravlund midt på natta saman med Della, som han nyleg har hatt ein fiasko av ein date med, men likevel fått sjansen til å møte igjen. Dei vandrar i lag, snart arm i arm, og snakkar om alt frå Shakespeare til slutten på verda. Dialogen er drivande og humørfylt gjennom dei første 70 sidene i romanen, replikkane vekslar flørtande mellom fornærmingar og tilnærmingar. «I am the Prince of Darkness», seier Jack ein stad, meint som både spøk og sanning. «No», kjem det kontant tilbake frå Della: «you’re a talkative man with holes in his socks».
