BETRING: Oppfølginga av familiar til funksjonshemma og alvorleg sjuke barn har ikkje alltid vore god nok, erkjenner regjeringa. Ho har no lagt fram eit forslag som går ut på å gjere tydeleg ansvaret hos kommunane slik at samarbeidet blir betre. – Vi veit at ikkje alle barn og unge får rett hjelp til rett tid, og at ikkje alle som treng det får eit heilskapleg og koordinert tilbod, seier barne- og familieminister Ida Lindtveit Røse (KrF). Regjeringa foreslår mellom anna å innføre lovfesta rett til barnekoordinator for familiar med barn som har alvorleg sjukdom, skade eller funksjonsnedsetjing og som har behov for langvarige og samansette tenester. ©NPK