Agnes Ravatn

Dei sju dørene

Litteratur

Samlaget 2019, 250 sider

Nina Wisløff, hovudpersonen i Agnes Ravatns nye roman, er professor i litteraturvitskap, av den litt matleie sorten som ein kan ha møtt i Dag Solstads lektorromanar. Nina nærmar seg pensjonsalder, men må enn så lenge utføre undervisingspliktene sine med det vesle ho har att av engasjement. Ho føreles stødig og traust om greske tragediar – om Aristoteles og Ødipus og skilnaden på hamartia og hybris – men blir ikkje akkurat møtt med stortenkte spørsmål frå den laptop-opplyste salen: «Gifta seg med mor si? What?» – «Skjedde det på ordentleg?»