Reinhaldar og tillitsvald Bjørn-Tore Olsen vil auke respekten for yrket. Det skal skje ved å gjere jobben synleg.

Klokka er halv sju. Bjørn-Tore Olsen sit ved kjøkenbordet i det vesle husværet han kjøpte i januar på Landås i Bergen. To rom og kjøken. Sonen Marcus på ti har soverommet; åleinepappa Bjørn-Tore søv på ein sovesofa i stova. Det er dekt på med Klassekampen-koppar til ære for journalisten, vervepremiar for nye abonnentar.