Nasjonal ramme for vindkraft på land set sinna i kok. I Hordaland og Sogn og Fjordane har det eine kommunestyret etter det andre takka nei til å få fjellheimen eller kyststripa si rasert av vindturbinar. På folkemøte, gjennom opprop og underskriftskampanjar vert det mobilisert mot NVE sine planar. I Dyrkolbotn i Lindås kommune i Nordhordland marsjerte 11. november 540 menneske i protest mot Norsk Vind sine sonderingar i Stølsheimen. Utval for kultur, idrett og regional utvikling i Hordaland har i ei fråsegn bede NVE skrinleggja planane for vindkraft i fylket.