Det har kome eit initiativ frå Finnmark om å invitera den russiske presidenten Vladimir Putin til 75-årsjubileet for den sovjetiske frigjeringa av Aust-Finnmark i 1944. Ved 70-årsjubileet møttest utanriksministrane Børge Brende og Sergej Lavrov i Kirkenes, slik det har vore offisielle markeringar i samband med denne hendinga gjennom heile den kalde krigen og også etter at Russland i 1991 avløyste Sovjetunionen som nabo i nord. Argumenta for at statsleiarane skal stå saman i markeringa av jubileet i 2019 er gode: Det vil vera eit signal om å normalisera relasjonane med vår store nabo i aust, i ei tid med sterk polarisering i verdspolitikken og der Norge har sterke interesser av lågspenning og samarbeid i Arktis.