Eit ektepar i dobbeltsenga, kroppane strakt side om side, utan å røra kvarandre. Ho freistar å prata, han les ei bok (sidan det ikkje vart sex). Dei er eit vellukka par i eigne og andre sine augo, men prisen for ein perfekt borgarleg fasade er at gapet mellom deira indre og deira ytre aukar med åra. Dei er forvirra, vonbrotne og sinte, og tar det ut på partnaren. Dei ligg i same seng, men i parallelle univers.