Ole Martin Rønning beklagar i Klassekampen 2. juli at han kan ha ordlagt seg uklart i samtalen om 100-årsjubileumet for 8-timarsdagen på Popvenstre. Poenget i mitt innlegg 27. juni var det Rønning hadde sagt svært klart og tydeleg: at aksjonane for å ta 8-timarsdagen 2. mai 1918 var «illegale» og «mislykka», og at dei var avgrensa til elektrokjemisk industri nokre få stader. Eg er ikkje historikar, men har lært at eit nyttig spørsmål når ein skal tolka vinning og tap i historisk perspektiv, er «for kven?» Aksjonane vart ikkje gjennomført overalt. Men var dei mislykka for til dømes Thune-arbeidarane i Kristiania? Dei tok åttetimarsdagen 2. mai, og frå den dagen var den innført på Thunes mekaniske verksted. Tilsvarande skjedde fleire stader.