NULLUTSLEPP: Eit hopehav mellom Noregs største meieri og gartneri har redusert klimagassutsleppa frå dei to verksemdene til null.

Klokka er 11.30. I den 452 meter lange korridoren, med plastikkvegg på eine sida og tre meter høge radar av tomatplanter på andre, kjem dei tilsette trillande på sparkesyklar. Først passerer to, så kjem to til, og brått er det ti på veg mot oss. Det er lunsjtid, og avstandane i gartneriet er så store at det einaste som duger, er å flytte på seg med sparksykkel.