Ebba Boye står fram som leiar av «Rethinking Economics Norge». Men det er lite av nytenking i kronikken hennar i Klassekampen 14. februar. Dessverre vidarefører ho gamle klisjear og fordomar om krisefenomen i dagens kapitalisme. Det primære og «moralske» skiljet mellom den gode real/industrikapital og den dårlege/vonde finanskapitalen går tilbake til Rudolf Hilferdings bok frå 1910, «Das Finanzkapital». Denne demoniseringa er meir mytologisk og demagogisk enn vitskapleg, og Boye må, for å få «teorien» til å stemme, gi låneinstitusjonar skulda for forhold som den produktive kapitalismen i hovudsak er ansvarleg for, så som lønsnedslag. Men trur Boye for alvor at presset for lengre arbeidstid, sosial dumping og ulike former for fagforeiningsknusing primært skuldast finanskapitalens herjingar?