Alle som har vore invitert til selskap i nordvest, kjenner til fenomenet det sunnmørske kakebordet. På Sunnmøre serverer ein ikkje «noko lite» til kaffien. Eit tjuetals kaker skal det helst vere, med namn som Kvæfjordkake, Karamellkake, Delfiakake, Tropisk aroma, Charlotte Russe, Lady Golden Glow, Hertuginnekake, Suksessterte, Budapestrull, Vanbakkels, Strandbakkels, Fromasjkake, Ostekake, Konfektkake, Mokkafromasj, og så vidare. Oppskriftene har gått i arv i generasjonar. Til alle barnedåpar, bryllaup eller femtiårslag som har vore feira ute med havet har bygdekvinnene baka kake på omgang, helst i ei form på 28 centimeter i diameter.