Mitt er i vinden for tida. Per Egil Hegge skreiv om «mitt» i spalta si i Aftenposten denne veka. Mitt Romney er på alles lepper for tida (sjølv om han ikkje eigentleg er aktuell på nokon som helst måte). Og jammen har ikkje ein fyr som heiter Jussi Järvi starta partiet «MITT Folkeparti». Han Jussi er lei av den tradisjonelle politikken:
«Vi mener at mange har gått veldig lei av rødt - grønt - blått - høyre - sentrum - venstre og derfor vil vi nå presentere MITT Folkeparti.» Dette skriv Jussi, og han har jo unekteleg eit par gode poeng. To av fem nytta ikkje røysteretten ved sist lokalval, skriv han, og meiner at eit parti som byggjer politikken på hyppige undersøkingar vil få opp entusiasmen. Etter kva eg forstår, er MITT Folkeparti bygd over lesten til Antonsen og Goldens «Det politiske parti», altså eit parti blotta for meiningar. «Eksempelvis vil vi gjennomføre ukentlige markedsundersøkelser der du kjapt svarer på 3-5 spørsmål og dermed effektivt viser veien for MITT Folkeparti», forklarer Järvi i ei pressemelding.
Det siste året har eg skrive saker om Feministisk Initiativ. Om Alternativet. Om Venstrepopulistene. Vi har skrive om Alliansen – Norge ut av EØS. Om Alliansen. Og sikkert nokre andre som eg gløymer i farta. Småparti er den nye olja. Neida. Men eg ser at folk meiner topartisystemet i Storbritannia og USA skaper politikarforakt. Det problemet vil vi ikkje få i Noreg med det fyrste. Det passar Jussi Järvi og hans likesinna på. «Så langt er vi bare 3 personer i styret og derfor søker vi flere genuint interesserte reisekamerater; gjerne med ikke-norsk bakgrunn», skriv dei på heimesida si. Open og inkluderande, veit du. Der har du MITT Folkeparti. Vi avsluttar med eit sitat: «BLI MED DA VEL?!»
Jens Kihl
Meinings- måling
Smell for høgresida
Ap har snart like mange stortingsmandat som dei fire borgarlege partia til saman:
Jens Kihl
ERNA KAN BLI FJERNA: Dagens Norfakta-måling for Klassekampen og Nationen gjev raudgrønt fleirtal. Ap, SV, Raudt, Senterpartiet og MDG får til saman 95 av 169 plassar på Stortinget. Med KrF er dei oppe i 104. Foto: Siv Dolmen
Med 38,7 prosent oppslutning er Ap tilbake på gamle høgder. Om dette skulle bli valresultatet neste haust, er det det aller beste sidan Bobbysocks vann Melodi Grand Prix.
Målinga er utført 6. og 7. desember, altså etter at budsjettavtalen blei landa mellom dei fire borgarlege partia.
Nestleiar Hadia Tajik i Arbeidarpartiet er svært nøgd med tala.
– Dette er ei veldig inspirerande måling, seier Tajik til Klassekampen.
Ho fortel at Ap til no ligg på eit snitt rundt 36 prosent på målingane i desember.
– I november blei det igjen raudgrønt fleirtal på snittet av målingane. Det er fint å sjå nok ei måling som går i same retning, meiner ho.
– Kan du stadfeste at Ap nektar å gå i regjering om de ikkje får 36,9 prosent i valet neste haust?
– Haha, nei. Eg kan stadfeste at vi ikkje kjem til å setje noko prosenttal for regjeringsdeltaking, seier Ap-nestleiaren.
Krisemåling for Venstre
På denne målinga får Venstre stusselege 2,7 prosent oppslutning. Det er 3,3 prosentpoeng lågare enn i november og eit godt stykke under sperregrensa. Endringa er større enn feilmarginen. Målinga avvikar frå andre målingar teke opp dei siste dagane. Hos både ANB og Schibsted-avisene låg Venstre på firetalet.
Venstre-nestleiar Ola Elvestuen svarer i ein e-post at 2,7 er eit for svakt tal:
«Dette er en dårlig måling for Venstre, men det er også en enkeltmåling. Med denne målingen ligger Venstre på rundt 4% i snitt i desember. Vi ligger nok jevnt over på en plass mellom 4% og 5% på meningsmålingene», skriv han.
Elvestuen meiner partiet kan vise til gode resultat den siste tida:
«Vi inngikk en budsjettavtale og tok ansvar for at landet ikke ble kastet ut i krise som en direkte følge av at Høyre og Frp gjennom sitt urimelige og svært uansvarlige ultimatum satte Stortinget i en svært vanskelig situasjon. Vi valgte også å ta ansvar for Stortingets enstemmige vedtak om Paris-avtalen, og vi fikk på plass en klimapakke som kutter klimagassutslipp. Å sørge for kutt i klimagassutslipp har vært avgjørende for Venstre i budsjettarbeidet.»
Desembersmell for Høgre
Trykk for større versjon
På denne målinga ser det heller ikkje ut til at veljarane takkar Høgre for å ha gjeve landet eit budsjett. Ein nedgang på 3,3 prosentpoeng er kraftig og større enn feilmarginen.
Trond Helleland, parlamentarisk leiar i Høgre, trur budsjettbråket er grunnen til at partiet hans no blir straffa.
«Dette går på tvers av de andre målingene vi har sett i det siste og er nok preget at budsjettrunden. Nå er vi blitt enige om et budsjett for flere jobber, bedre velferd og betydelige utslippskutt, det tror jeg vi belønnes for ved neste måling», skriv Helleland.
Han har von om at meir Høgre-politikk skal vere lokke veljarane tilbake.
«Høyre skal synliggjøre at løsningene våre virker: Lavere helsekø og kortere ventetid, elevene lærer mer og veiene blir bedre. Den sårbare økonomiske oppgangen vi nå ser må forsvares og forsterkes. Vi skal vise velgerne at Høyre tror på Norge og har den riktige politikken for å ta oss gjennom omstillingen.»
Nesten fleirtal
Med Aps 71 og Sps 13 mandat manglar dei berre éin representant for å få fleirtal. Både SV, KrF, MDG (og for den saks skuld Raudt og Venstre) kan skaffe Jonas Gahr Støre og Trygve Slagsvold Vedum fleirtal i Stortinget. SV får ni plassar, og Raudt og MDG er inne med éin.
Det ser heller ikkje ut til at Listhaug-bråket har skaffa Frp fleire veljarar den siste månaden. Partiet står på staden kvil frå november. Om dette blei valresultatet, ville dei mørkeblå mista fire stortingsrepresentantar.
Det er personleg nedbrytande å gå seg vill i alle tinga sine.
Solveig Aareskjold
Kaotiske røvarar: Kasper, Jesper og Jonatan.
I haust har det kome fleire bøker om korleis ein kan halda orden i huset. Jamvel eg som ikkje har lese nokon av dei, har via mellomkvinne lært at underbukser og t-skjorter ikkje skal brettast flatt og leggjast i stablar, men rullast saman og setjast på høgkant i skuffa. På den måten blir det mykje betre plass, og eit raskt augekast gjev fullt oversyn.
Meir omfattande system for lagring og sortering vil som regel bryta saman straks nokon i huset har det litt travelt. Då løner det seg betre å driva åtferdsgransking på seg sjølv, og tilretteleggja sine eigne rutinar som for ein lettare utviklingshemma. Du startar med å følgja dine eigne spor frå rom til rom og notera deg dei kritiske punkta: Kor er eg når eg ikkje kan finna verken buksa eller skjorta mi, når eg ikkje skjønar kor nøklane har blitt av og skorne framleis er blaute? Så snur du motsett veg og skrur opp ei rist til skorne og ein knagg til nøklane.
Bukser og skjorter som forsvinn, har som regel gøymt seg innimellom andre klesplagg. Skal dei bli meir synlege, må du reinska ut alt som skuggar for dei. Vil du ikkje gje det til Frelsesarmeen enno, kan du inntil vidare leggja det på ein så bortgøymd stad at det ikkje finn heim igjen på eiga hand.
Sjølv om dei færraste lengtar tilbake til den tid då folk flest åtte eit einaste par sokkar som aldri blei vaska, berre rista kraftig no og då, er det personleg nedbrytande å gå seg vill i sitt eige rot.
Kardemommebyrøvarane Kasper, Jesper og Jonatan trudde at dei hadde funne ein farbar veg ut or kaos då dei kidnappa tante Sofie og plasserte henne i kjøkenet sitt. Problemet var berre at ho likte så altfor godt å ha tre menn å kommandera over. Derfor nytta dei første høve til å senda henne tilbake. Men like etter sette mektigare samfunnsmakter røvarane i arrest, og då dei slapp ut igjen, gifta Kasper seg visstnok med tante Sofie. Fengselet må ha fått han til å forstå at han måtte skifta spor om han skulle overleva.
No som jula stundar til, og slekts- og venskapsband skal stadfestast, er det mange som ikkje veit annan måte å gjera det på enn å dyngja på med asiatiske industriprodukt. Heile flodbølgjer av pakkar veltar inn i heimane og får gullet, røykelsen og myrraen som dei vise mennene frå Austerland hadde med til Jesusbarnet, til å verka sjokkerande enkelt. Dei skal forresten ha heitt Kaspar, Baltasar og Melkior, i ei soge som er mykje eldre og minst like sann som den om dei tre røvarane.
Ordet blei kjøt og tok bustad blant oss, heiter det. For dei som føretrekkjer jordiske forklaringar framfor teologiske, kan det tolkast som at ein idé blei sett ut i handling, at skiljet mellom kropp og ånd blei oppheva, at det kvardagslege rutinearbeidet blei eit personlegdomsutviklingsprosjekt. Harmonien ligg i omgje seg med enkle ting som til gjengjeld er både nyttige og vakre, guddomlege reiskapar til vedlikehald av det heilage menneskelivet.
Ikkje søtt, ikkje surt, ikkje bittert – men salt. Solveig Aareskjold skriv om det ho sjølv vil i Klassekampen kvar laurdag.
«Heile flodbølgjer av pakkar veltar inn i heimane»
