Sjølv om du aldri har vore på Raglamyr utanfor Haugesund, så har du vore der. Raglamyr er ikkje noka myr lenger. Raglamyr er tungt asfaltert og dekt med plasskrevjande næring: Det største kjøpesenteret i omland, engros, diverse terminalar og butikkar i Jysk-segmentet. Ditt Raglamyr ligg ved hovudfartsåra inn til byen din. Det ligg i behageleg bilavstand frå alt. Staden flyt utover. Kantane er borte, grå asfalt går over i grå fasadar. Fasadane på bygga ser ut som baksider. På Raglamyr er logikken borte: Du må køyra til høgre for å komma til venstre. Her finst ingen snarvegar eller himmelretningar. Det er berre tolv pedagogiske flaggstenger som fortel deg kor du er.