Det blir for tida snakka mykje om at cd-en er død. Samstundes snakkast det ein del om at lp-en har stått opp frå dei døde. For oss som jobbar med å gje ut musikk i ulike format, er dette ein type snakk som berre pirkar på overflata av utviklinga i musikkbransjen og berre er oppteken av «siste teknologiske og musikalske trend». For oss som nærast kvar dag får musikk frå ein heil hær av musikantar som ønskjer å gje ut musikk på cd, ser verda annleis ut. Og så heldige er vi i norsk musikkliv at eit stort mangfald i format og musikk framleis er mogleg, takka vere treffsikre kulturpolitiske ordningar.