Ho kom frå kjøkkenet og spurte han om kva fastelavnsbollar het på bergensk. I farten kunne han ikkje komme på det og måtte finne på nokre unnskyldningar. Mor og far var austlendingar, så hos dei het det aldri noko anna enn fastelavnsbollar. Han var dermed «førstegenerasjonsinnvandrar» og kunne heller ikkje rekne med å ha lært alle dei finurlege orda i bergensdialekten. Dessutan vaks han opp på Paradis og Nattland, som den gangen ikkje var i Bergen, men Fana, og no har han snart budd førti år i eksil. Ho derimot, som er frå Ringerike, visste at det het heiteveggar.