For ei framtid det skal bli for oss dagens unge! Vi som arvar eit klima i feberrus, vi som ikkje gjer opprør mot det etablerte, mot foreldre og institusjonar, som ikkje eingong tar oppvasken eller dritjobbane. Takke seg til EØS-samarbeidet som sender polakkane til landet til båtbygging og oppussing. Takke seg til tamilane som vaskar golva og tørkar eldrebølgja. Svenskane som skrellar banane våre, medan vi sklir på vårt eige bananskal. Utdanning! Høyrde eg nokon seie utdanning? Vegen til det søte liv, til mjølk og honning og salt i grauten, er brulagt med studielån og velmeinande foreldre. Framover, framover, målet er ukjent, midlane er fullførte eksamenar og vitnemål.