Finn Oluf Nyquist synest å vere samd i hovudpoenget i artikkelen min (7. mai) når han skriv (13. mai) at det er «på høy tid at sovjetfolket og den røde armé får den anerkjennelse de utvilsomt fortjener for sin innsats i kampen mot fascismen under 2. verdenskrig.» Det var også føremålet med artikkelen min. Så finn Nyquist at visse sider ved krigen manglar i min artikkel. Sjølvsagt! På to avissider har eg pressa inn ein tematikk som den britiske historikaren John Erickson bruker 2000 sider på. Eg vektla dét ved krigen som eg gjennom 40 års undervisning har erfart er lite kjent: Hitlers Operasjon Barbarossa – mot Sovjetunionen. Når utfallet på denne arenaen avgjorde krigsutfallet, må det vere ei legitim tilnærming ved 70-årsmarkeringa.