Jon Hellesnes har vorte intervjua i Klassekampen i samband med utgjeving av si nye bok «Ballongferda og andre skriftstykke.» Boka har eg ikkje lest, men eg går ut frå at intervjuet på treffande vis gjengjev meiningane til Hellesnes. Det ser ut til at han er motstandar av dei reformene som den blå-blå regjering går inn for når det gjeld samanslåingar av kommunar og politidistrikt. Som vanleg er med filosofar løftar han det enkelte opp til noko allmeint og overordna (hypostaserar det, som det heiter i slike krinsar), og meiner at desse reformene bryt med den allmeine visdomen, på dette området i det minste, til vitskapsfilosofen Karl Popper, som går inn for små, gradvise reformer, der det er mogleg å korrigera undervegs. Reformene til den blå-blå regjeringa kan derimot samanliknast med Stalins vanvittige og dramatiske jordbruksreformer.