I det siste har eg tilbrakt mykje tid på namnesider av typen «Hva skal barnet hete?» Det er mange omsyn å ta. Namnet skal klinge bra, samstundes må det kle den som får det. Nokre namn er uaktuelle fordi eg kjenner nokon som heiter det (utan at det passar seg med oppkalling). Så vil eg jo heller ikkje velje altfor oppsiktsvekkande eller uvanlege namn som kan bli til bry seinare og som andre kan henge seg opp i. Kanskje er det enklare å bestemme seg i min situasjon, sidan eg ikkje treng å bli einig med ein partnar om kva namn som passar. Likevel manglar eg framleis namn på fleire av karakterane i romanen eg skriv på.