* SVs leiarkandidat og barne- og likestillingsminister Audun Lysbakken har med snaue åtte sider i si vesle bok «Frihet, likhet, farskap» sett dagsorden for vekas kjensledebatt: Har ammepresset gått for langt? Er dei sosiale, kvinnepolitiske og også helsemessige normene for full amming så lenge som mogleg til hinder for likestilling - i yrkeslivet for mor, i familien for far? Dette har på karakteristisk vis utløyst ein debatt der Lysbakkens motstandarar startar med å forvrengje det han seier om amming, for så å hakke laus på den forvrengte versjonen. Overlege Gro Nylander, med landets tyngste autoritet i ammespørsmål, seier at Lysbakken vil «jage» kvinner med spedbarn for tidleg tilbake til arbeidslivet. Dette er å ta folk i verste meining.