* Fredag var det 50 år sidan Sosialistisk Folkeparti (SF) vart stifta. Det skjedde ein laurdagskveld i Bygningsindustriarbeidernes Hus i Oslo, med tvil og uvisse til det siste. Kjernetroppen var Orientering-kretsen, som vart sparka ut av Arbeidarpartiet få veker tidlegare. Men Frank Rossavik understrekar i si fargerike bok om SVs fargerike historie at også andre hadde ein stor aksjepost i partiprosjektet, som Torolv Solheim og forfattaren Sigbjørn Hølmebakk. Ein manande appell frå Hølmebakk skulle til for å «skape mot og klarhet i den røykfullte luften»: «Pionerene telte ikke på knappene. De spurte ikke embetsmennene om fullmakt. De snakket ikke seg imellom om navnene var store nok. De handlet, fordi de visste at deres sak var riktig. Og med disse ord vil jeg anbefale at partiet blir stiftet».