Biologen Trofim Lysenko og Sovjetunionen underkjente arvelæra i store delar av førre hundreåret. Lysenko sine feilsteg kan òg tene som åtvaring mot å la kortsiktige politiske omsyn styre vitskapen i vår eiga tid, meiner Nils Roll-Hansen. Professor i vitskapshistorie Nils Roll-Hansen er aktuell med bok om Trofim Lysenko. Den utrulege historia om korleis ein middelmådig ukrainsk plantefysiolog kunne svinge seg opp til å bli Sovjetunionens dominerande landsbruksvitskaplege skikkelse – og frå den posisjonen avfeie all genetisk vitskap i over 30 år – er fortald i boka «The Lysenko Effect».