I går opna det nordlegaste marinlaboratoriet i verda. Kjell Magne Bondevik skulle seie nokre ord, og dei som bur der ønska at himmelen skulle vere blå slik at du kunne sjå fjella, og kan hende isbjørn. For dette skulle vere stort og vakkert. 90 gjestar var venta til Ny-Ålesund, Svalbard. Diplomatar, ambassadørar, høge herrar frå Kina. Noreg marknadsfører forsking og infrastruktur. Men det er ikkje berre Noreg som får vist seg fram. Ein femdel av marinlaben er sponsa av det amerikanske gigantoljeselskapet Conoco Phillips. Dei seier det ikkje skal ha nokon innverknad på forskinga. Men kvifor ønskjer Conoco Phillips seg hit, mon tru? Ny-Ålesund lever av reint miljø og natur. Dei har kjempa mot at kullselskapet Store Norske skulle få bore etter gull, no kjempar dei for å reservere Kongsfjorden for forsking. Cluet for Conoco er noko anna. Det ligg lenger ut, i havet, svart skvulpande rikdom.