Det er lang tradisjon, både i LO og i LO-forbunda, for at innstillinga frå valkomiteen ikkje skal gjerast kjend før like før valet skal gjennomførast. Det har ikkje hindra at det har vore rikeleg med spekulasjonar både i pressa og via jungeltelegrafen om kva som kan vera i vente frå valkomiteen, både når det gjeld reduksjon av LO-leiinga frå åtte til seks personar, og kva for personar som er tiltenkt posisjonar i den nye leiinga. Medan ein del andre større organisasjonar har endra praksis – somme har gått over til å senda ut valkomitéinnstillinga før eit landsmøte – er det ingen teikn til endring i LO. Jan Davidsen, leiar i Fagforbundet og valkomitéleiar på LO-kongressen, ser heller ingen grunn til at dette skal gjerast på anna vis.