Kultursidene i Aftenposten og Dagbladet har dei siste dagane minna om plottet i ein Woody Allen-film: livet og kunsten hermar kvarandre, eller rettare kunsten stel frå livet. Eks-veninna til forfattaren Hanne Ørstavik har gått til frontalåtak på forfattaren. Ho meiner Ørstavik på utleverande vis har nytta ho som modell for hovudpersonen i «Like sant som jeg er virkelig». Tittelen på Ørstaviks gjennombrotsroman fekk dimed ein ironisk klang. Men eks-veninna gav seg ikkje med det. Ho syntest det var på sin plass å ta att med nokre intime avsløringar om Ørstavik.