Abdirahman Tarabi er fortvila. Han er frå Somalia, og norsk statsborgar, og då han og kona gifta seg i oktober 2002 søkte dei om at ho skulle få koma til Noreg gjennom såkalla familiesameining. Søknaden vart levert til den norske ambassaden i Addis Abeba, Etiopia. Våren 2003 fekk han advokathjelp til å etterlysa svar på søknaden. Kona var gravid, og dei hadde håpa ho skulle få komma til Noreg før fødselen. Dottera vart fødd i juli 2003, og i september 2003 opplyste Utlendingsdirektoratet (UDI) at dei ville venta med vidare saksbehandling til dei hadde «mottatt søknaden fra barnet», som på det tidspunktet altså var to månader gammal. Først i april i år vart Tarabi innkalt til obligatorisk intervju hos Oslo politidistrikt.