Hundreårsjubileet for det uavhengige og sjølvstendige Norge ligg eitt år fram i tida, og går det slik mange vil, vil denne fasen i vår historie snart vera eit avslutta kapittel. Irland, som i sin sjølvstendekamp lærte mykje av unionsoppløysinga mellom Norge og Sverige, fekk berre åtti år som sjølvstendig nasjon i moderne tid. Same kva ein meiner om EU, kan ingen oversjå at globaliseringa av verdsøkonomien og data-teknologien stiller spørsmålet om politisk sjølvstende på ein ny måte. Mange store avgjerder om vår framtid blir tatt utanfor landets grenser. Med andre ord: Vil den norske forteljinga halde fram etter 2005, eller vil den rett og slett bryte saman fordi den ikkje svarer til noko politisk prosjekt i den verkelege verda?