«Målungdommen vil fortsatt ikke oppgi medlemslistene sine.» Slik avsluttar Tone Foss Aspevoll og Hans Petter Sjøli ein firesiders artikkel om Norsk Målungdom laurdag 10. januar. Slik insinuerer dei at NMU framleis driv med medlemsjuks. Det er ikkje tilfelle. Me i sentralstyret har rydda opp. Grunnlaget for påstanden er at Aspevoll ikkje fekk utlevert ein kopi av medlemslistene våre då ho var innom kontoret vårt. Er det unikt for Norsk Målungdom at ein ikkje leverer ut medlemslister til pressa? Om journalist Aspevoll hadde spurt alle organisasjonane i landet etter medlemslister hadde ho neppe fått ei einaste.