I dag overtar Den norske kortfilmfestivalen nok ein gong Grimstad kulturhus. Festivalen, som i år arrangerast for 26. gong, har funne si form i den hyggjelege sørlandsbyen. Arrangementet som er ein kjærkomen møtestad for særleg yngre filmskaparar, viser også at det er eit mangfald av talent i norsk film, om ein tolkar bransjen i vidaste forstand. Av over 380 innsendte bidrag er 53 kortfilmar og 13 dokumentarfilmar valde ut til hovudprogramma og konkurranse om Gullstolen og prisen for beste norske dokumentar. I tillegg til internasjonale prisvinnarar innanfor både kort og dokumentarfilm, debattar og regissørpresentasjonar, er det sjølvsagt i fyrste rekkje det norske hovudprogrammet som er hovudattraksjonen i Grimstad.