Norsk Ordbok skal dokumentere nynorsken og dei norske dialektane, og har passert bokstaven F. I går vart band IV lagt fram under stor festivitas i Domus biblioteca, Oslo. Det heile var eit signal om at Norsk Ordbok har fått ein ny vår. Ordbokprosjektet vart sett i gong i 1929, og det har gått seint. No skal alt dette endrast. Høvet er 200-års-jublieet for norsk sjølvstende i 2014. Då skal det siste bandet vere ute i bokhandlane. Dei tre tidlegare banda tok tiår å gjere ferdig – band I kom i 1966, band II i 1978, band III i 1994 og no altså band IV i 2003. Dei nye banda skal publiserast i langt høgare tempo – om lag kvar 19. månad, dersom alt går etter planen. Og det skal det, forsikra både prosjektleiar, Kristin Bekken, kulturminister Valgerd Svarstad Haugland og rektor ved UiO, Arild Underdal.