Måndag la det regionale foretaket Helse Nord fram rapportar som konkluderer med at akutt kirurgisk beredskap og fødeavdelingar skal vekk både på Helgeland og i Hålogaland. Få politiske saker skaper sterkare lokal motstand enn forslag om nedleggingar av sjukehus og avdelingar, og prosessen går tregt. Med Tore Tønnes foretaksmodell kan det bli større fortgang, for no er avgjerdene flytt ut av folkevalde fylkesting og inn i lukka styremøte. Neste steg i omdanninga av helsevesenet er ein ny modell for finansiering. Modellen som Hagen-utvalet foreslår i si innstilling, legg opp til sterk sentralisering av makta over investeringskapitalen. Dei lokale sjukehusa bør ikkje få betalt «en stykkpris der også kapitalbruk forutsettes finansiert», skriv utvalet. Dette er fordi ei slik betaling «vil redusere muligheten regionale helseforetak har til å ta overordnede grep i forhold til endringer i sykehusstrukturen». I klårtekst er «overordnede grep» ofte nedlegging og sentralisering.