– Kva er friløft? Kva brukest hydraulikken til? Kva slag forbrenningsmotor kan ein truck ha? Spørsmåla kjem i rask rekkjefølgje frå Jon Lillehagen, som underviser i teoridelen på Truckførerskolen. I eit lite klasserom er sju kursdeltakarar samla, sju menn som aller helst vil ha ein heilt vanleg jobb dei kan leva av, men som har fått merka at det ikkje er like lett å få for alle i dette rike, kalde landet. Korkje Hassan Yassin (25) eller David Thompson (36) har problem med å skilja mellom diesel-, propan- og bensinmotorar. Lågtløftande og høgtløftande truckar, skuvemasttruckar, støttebeinstruckar, sidestablande truckar, motvektstruckar og teleskopbomtruckar er alt saman velkjende omgrep. Ein av dei kommande truckførarane kjem frå Etiopia, dei fleste frå Somalia. Eit par av dei har vore i Noreg i fjorten år, ein annan i seks. Ein er 25, ein annan 53. Felles for dei er at dei er deltakarar på Alfa-prosjektet, og har tru på at det skal betra sjansane til å komma i jobb.