Den snurrige newzealendaren Peter Jackson sette før jol i fjor kinoverda på hovudet med si filmatisering av ei av dei store kultbøkene frå 1900-talet: JRR Tolkiens Ringenes herre. Jamvel kritiske Tolkien-kjennarar måtte vedgå at den mediale overføringa av dette 1200 siders handlings og karakterspekka mytologiske universet, med filologen og katolikken Tolkiens språklege nyskapingar og moralske fabelforteljingar, hadde gått rimeleg bra. Det jamne kinopublikum og dei fleste filmkritikarar var nær ekstase over Ringens brorskap. I år kjem del to, To tårn, før det heile blir avslutta neste år med Atter en konge.Av dei 1.025.000 folka som såg den fyrste filmen i Noreg, var det heile 143.500 som såg han under kuppelen på Colosseum kino i Oslo. Natta før billettsalet starta, stod 600 folk i kø framfor inngangen. Over halvparten av dei hadde overnatta minst ei natt, dei ivrigaste hadde budd framfor kinoen ei veke, iført kostyme, medan dei førte Tolkien-debattar, las bøker, spela brettspel og grilla pølser. Ei unik hending. I år opnar billettsalet 4. november. Dei fyrste køståarane kom 14 dagar før. Men denne gongen har distributøren Svensk Filmindustri, Oslo kinematografar og «eventselskapet» Den sjette sansen lagt planar for køståarane. Frå fredag blir køa flytta ned i Frognerparken, der det skal byggjast Hobbit-landsby med vertshus, der det skal gå føre seg rollespel, høgtlesing, leirbålsynging av songar frå bøkene og så vidare, før dei morgonen 4. november skal gå i fakkeltog opp til billettluka på Colosseum.