Remi ­Skytterstad

Elva som renner rundt livet

Gyldendal 2026, 366 sider

Lagnaden til urfolksgrupper verda over har så tragiske dimensjonar at ein kan kvi seg for å ta det inn over seg – eg gjer i alle fall det. I Noreg handlar det om den brutale fornorskingspolitikken som samiske, kvenske og andre minoritetar vart utsett for. Men det finst også ein latent vitalitet i historia, både i kulturane som vart fordømde som heidenske og primitive, og i raseriet mot overmakta. Slik vitalitet strøymer gjennom debutromanen til Remi Skytterstad, i ambisjonsnivået, kreativiteten, sterke påstandar og, ikkje minst, i engasjementet for samisk kultur og naturreligion.