Der stod me, som om me var slegne paa munnen alle saman. Aa, so harme som me vart!», skreiv ei Vinje-kvinne til kvinnetidsskriftet Nylænde for 125 år sia. Ho fortalde om kva som hende søndag 19. mars 1899. Folk i Vinje i Telemark var inviterte til å vera med og avgjera om Elias Blix sine salmar skulle brukast i kyrkja. Dette skulle gå føre seg på demokratisk vis. På førehand var det sagt at både kvinner og menn over 25 år skulle ha røysterett. Kvinnene såg dette som eit framsteg, før hadde det vore berre «husfedrane» som skulle avgjera slike saker. Dette var, som mange veit, eit par år før kvinner i Noreg fekk avgrensa kommunal stemmerett. Men inga lov sa noko om røysterett ved «folkerøystingar» i kyrkja.