Ein nybada kropp med ein stor sekk på ryggen ventar på at namnet hans skal bli lest opp. Seks år og tre månadar. Han har på seg T-skjorta han liker best, og har dratt kammen gjennom det lyse håret. På ein scene står ein mann i bunad og deler ut roser til dei små barna med dei store sekkane. Det er rektor. Han les opp namna, prøver å vera morosam og tar barna i handa. Så stiller dei seg på rekke og rad, plukkar litt på rosa dei har fått, og smiler når foreldre og føresette tar opp mobilane for å fotografera dei. Deretter går barna saman inn i klasserommet, der nokon har pynta med blomar og flagg og skrive velkommen med store bokstavar.