SANKSJONAR: Noreg blir med på EUs nye sektorsanksjonar mot Kviterussland. – Desse tiltaka er eit nødvendig svar på dei omfattande menneskerettsbrota som blir gjorde av kviterussiske styresmakter, seier utanriksminister Ine Eriksen Søreide (H) og krev at regimet lauslate dei politiske fangane. EU har innført restriksjonar på handel med utstyr til intern undertrykking, fleirbruksvarer, tobakksvarer og petroleumsprodukt, noko Noreg har slutta seg til. Sektorane gir Kviterussland betydelege inntekter. Noreg vel òg å følgje den fjerde runden av EUs listeføringar av kviterussiske tenestemenn og selskap.©NPK