PÅ BOKS: Mange nordmenn hasta til butikkane for å hamstre då koronapandemien kom og Noreg stengde. Salet av hermetikk dobla seg i vekene etter stenginga. – Samanlikna med same periode i fjor, er det ei dobling i salet av middagshermetikk, seier kommunikasjonsdirektør Elisabeth Aandstad Ekheim i Orkla Noreg. Det er ifølgje Ekheim ny rekord for middagshermetikken. Hamstring av dopapir gav òg eit kraftig utslag i statistikken. Vaske- og hushaldsartiklar auka med heile 82 prosent i veke 11, same veke som regjeringa innførte koronatiltaka. Det kom fram i Nielsen Noregs rapport for det første kvartalet i daglegvarebransjen i år. ©NPK