Det brenn i kinna mine. Sola stakk skikkeleg på fortauskaféen etter jobb i dag, og eg elskar sola! Har alltid vore den første til å pakke meg ned i sovepose og ullpledd i solveggen. Lukke augo for all verdas krav og berre sitte med andletet lukkeleg vendt mot eldkula. Dei siste åra har eg sjølvsagt vore klar over både rynkeeksplosjon og kreftfare, men har sagt til meg sjølv at det er verdt det. Det einaste som har bremsa vårgleda er allergien. Pollensesongen er for lengst i gang, men eg er i alle fall ikkje aleine lenger om å nyse, klø og renne. Talet på allergikarar og astmatikarar er ifølge Norges Allergi- og Astmaforbund tredobla dei siste åra i dei fleste industrialiserte landa i Europa.