Når eg dreg skorne av hesten Balder og ser at høvane har laga dei åtte sko-greinene blanke attarst, då er eg tilfreds, då veit eg at hovspelet verkar, og at me har god von um fleire år i lag i skog og mark og over fjell og finne, Balder og eg. Det er når hesten med tyngd trør ned at attarste deildi av hoven vidkar seg ut for å døyve støyten av steget og samstundes suge blod radt ned den blod- og nerverike lærhudi inne i hornhoven. Difor må ikkje attarste deildi av hoven læsast fast mot skoen med saum, men fritt få spela på ut og inn for kvart steget. Og sjølvsagt, med sko på veks hoven utan slit og lyt spikkast ned for å få rett skap både sett frå sida og frammantil etter at skoen er burte.