* «Har tatt fra mor for å gi mer til far», melde Aftenposten på framsida laurdag. Avisa tok for seg foreldrepermisjonen og ordninga med fedrekvote, som gjerne blir kalla pappaperm. Frå 1. juli vart fedrekvoten utvida med to nye veker, og sidan 2005 har kvoten auka enda meir enn den totale foreldrepermisjonen. Det er korrekt at mødrer no maksimalt kan ta ut 35 veker permisjon med full lønn, mot 38 for åtte år sidan. Men det er feil når Aftenposten skriv at regjeringa har tatt frå mor for å gi meir til far. Det bygger på eit premiss om at foreldrepermisjonen, med unntak av fedrekvoten, er mor sin permisjon. Dermed illustrerer Aftenposten korfor det var rett å innføre ei eiga fedrekvote.