Som Klassekampen viste laurdag er Noreg vorte eit rimeleg land å leggja ned fabrikkar i, samanlikna med andre land som Frankrike, Nederland og Tyskland. I Tyskland har arbeidarar krav på inntil fire årsløner i «fallskjerm» dersom ei verksemd går til oppseiingar. I Nederland kan sluttpakkene til vanlege tilsette koma opp i 30 månadsløner. Ikkje slik i Noreg: Når Norske Skog no vil leggja ned papirfabrikken Union i Skien, kan dei trygt gjera dette utan å måtta bruka pengar på etterløn eller «gyldne fallskjermar» for dei tilsette. Det finst heller ikkje lovverk som hindrar Norske Skog i det fullstendig usosiale vedtaket å nekta andre å driva verksemda vidare.