I innleingskapitlet til «Organisasjonsbilder» av Gareth Morgan blir det fortalt ein liten stubb frå det gamle Kina: Vismannen Tzu-gung, som levde i det fjerde hundreåret før Kristus, møtte ein gong ein gammal landarbeidar som sleit livet av seg med å klatra ned i brønnen etter vatn til vatningsgrøftene. Vismannen rådde han til å laga seg ein heis med ei vektstong av tre. Men den gamle slitaren svarte at den som tek maskinar i bruk, vil arbeida som ein maskin. Og den som arbeider som ein maskin, vil få eit hjarte som ein maskin. Det var ikkje det at han ikkje visste at det fanst slike vektstonginnretningar, men han ville skamma seg over å ta i dei.