Det er høgst sannsynleg ei heilt eineståande rettssak som startar i Oslo tingrett i dag. Zyrafete Ademi, som kom hit som flyktning frå Kosovo, går no til sak mot den norske staten for å få lov til å bli i landet i lag med barna sine. Dei fem barna, den eldste nitten og den yngste tre år gammal, har fått varig opphald i Noreg som følgje av stortingsvedtak sommaren 2004. Ei mellombels forskrift skulle sikra retten til varig opphald for barn som hadde budd lenge i asylmottak. Men når det kom til stykket, avgjorde Utlendingsnemda (Une) at det berre var dei fem barna i familien Ademi, og ikkje foreldra deira, som skulle omfattast av forskrifta.