– Han såg så forkommen ut. Eg tenkte at nokon må rekkje ut ei hand til han så han ikkje skulle vere så einsam lenger. Wibke Bruhns – forfattar, tidlegare journalist i magasinet Stern og, som den fyrste kvinnelege nyhende-opplesaren på tysk tv, ei levande legende i Tyskland – fortel om far sin, Hans Georg Klamroth. Bruhns har skrive boka «Meines Vaters land» (Min fars land) om faren, og det heile byrja nettopp med at ho såg filmopptaket frå rettssaka mot han. Klamroth vart avretta 26. august 1944 fordi han var involvert i oberst Claus von Stauffenberg sitt 20. juli-attentat mot Hitler. Boka til Bruhns har vorte ein bestseljar i Tyskland, med over 200.000 selde eksemplar, og torsdag var forfattaren på Goethe Institut i Oslo for å snakka om boka.