Oslo kommune forhandlar for tida på overtid med det svenske forskarmiljøet som har tilbydd seg å evaluere sidemålsforsøket i Oslo-skulen. Dersom forhandlingane strandar, vil kommunen stå på bar bakke med omsyn til fagleg evaluering av forsøket. At forsøket skulle evaluerast av eit kompetent fagmiljø, var ein føresetnad då bystyret vedtok ordninga. Men bystyrerepresentant for Ap og medlem i Kultur- og utdanningskomiteen Nina Bachke ser ingen dramatikk i at eit slikt forskingsopplegg enno ikkje er i boks:– Det er byrådet som er ansvarleg for forhandlingane, eg sit ikkje på noko detaljinformasjon og kan ikkje gjere anna enn å avvente beskjed frå byråden, seier Bachke, som meiner oppdraget må utlysast på nytt dersom forhandlingane strandar .