Bør nye statsborgarar sverja truskap og lojalitet til Noreg? Og ville du ha gjort det sjølv, om du fekk tilbod om det? Det kan det vera grunn til å spørja seg om, etter at regjeringa i går foreslo å innføra ein frivillig seremoni for dei som får statsborgarskap etter søknad. Og eit sentralt element i seremonien skal vera ein truskaps- eller lojalitetslovnad. Ordlyden i lovnaden skal utarbeidast i tråd med det som blir praktisert i Australia, der seremonien er obligatorisk, og forslaget kom i regjeringa sitt framlegg til ny lov om statsborgarskap. Ifølgje regjeringa skal seremonien få fram det gjensidige forholdet mellom staten og den borgaren som får statsborgarskap. Framlegget om ein slik seremoni vekkjer ulike reaksjonar, både Fakhra Salimi, dagleg leiar for MiRA-senteret og Blitz-veteranen Stein Lillevolden er blant skeptikarane.