I ein kommentar til den nyleg utkomne boka «Radikal individualisme», skriv Bjørgulv Braanen blant anna følgjande her i Klassekampen 12. oktober: «Kanskje den mest interessante delen av denne ideologikritikken er oppgjøret med den kapitalisme-entusiastiske 'postmodernismen', som har overført den revolusjonære utopien til det vi faktisk har, til konsumerismen og kapitalismen.» Det kan godt hende at «postmoderne» teori er blitt brukt på dette viset blant anna på «amerikanske universiteter», slik Braanen skriv. Problemet oppstår når Braanen vel å ikkje skilja mellom denne bruken og det synet tenkjarar som Derrida, Foucault og ikkje minst Deleuze faktisk stod for. Dermed utfører Braanen same type kortslutning som dei som hevdar at marxisme er det same som støtte til totalitære diktatur, fordi Sovjetunionen under Stalin, som jo kalla seg marxist, utvikla seg til eit imperialistisk og totalitært diktatur.